Den Wiryadi walon deui, ari perkara eta mah, kari kuma' engkang bae, kawantu acan kantenan, jadi sareng henteuna, jadi jodo bae tulus, hade-goreng milik engkang.
Sakitu walon Wiryadi, caritana henteu lunta, malaweung ngahuleng bae, Salim ningal pameunteuna, kawas nu kurang senang, Jang Salim nyolondo tuluy, tapak deku pupuntenan.
Ngomongna nu semu sedih, pokna neda pangampura, wireh abdi wantun nyelok, naha geus lali gamparan, kapan sim abdi tea, nu disangka geus dikubur, disebatkeun prantos ajal.
Kapan ieu jisim abdi, Salim dulurna Salamah, Den Wiryadi langkung kaget, tina korsi lajeng cengkat, bari metot leungeunna, ka Salim nu tapak deku, semu bungah mamanahan.
Bari nyaur kutan ayi, naha geuning kikituan, paingan ceuk rasa hate, engkang rada asa-asa, estu teuing teu nyana, ayi masih keneh hirup, sugan teh enya geus ajal.
Engkang banget heran teuing, naha ibu geus uninga, wireh ayi aya keneh, reujeung kumaha asalna, engkang ku hayang terang, pang ibu geus nyangka pupus, 'na ayi atuh ka mana.
Sanggeus Salim diuk deui, baralang tuluy nyarita, lalakonna cacarios, ditetek henteu kaliwat, tina kawitna sasab, nepi kana gering ripuh, di rumah sakit tatamba.
Jeung deui sanggeus bijil, terus kuli-ari tea, jeung tuan Berling paamprok, tepi kana meunang beja, ruan Jasper nyarita, Ujang Salim boga dulur, anu aya di Pandeglang.
Sarta dicaturkeun deui, Jang Salim tas ti lemburna mendakan ibu teu nyondong, kabujeng angkat ka Mekah, nya terus ka Pandeglang, nyusul-nyusul mapay dulur, anu acan kenal tea.
Samemeh ku Ujang Salim, dicarios lalakonna, waktu jeung uana amprok, Raden Wiryadi mariksa, pokna saderek tea, naha parantos patepung, jawab Salim aja berkah.
Wiryadi mariksa deui, kumaha lantaran tepang, kapan pada henteu nyaho, Ujang Salim pok ngajawab, margi aya saksina, wireh sim abdi ngabantun, potret rupina pun bapa.
