Sadaya pakakas bumi, samemeh bade dilelang, dipisah sakur parabot, anggoeun Tubagus Raksa, ninggalan saperluna, korsi meja tempat tidur, sabrukna keur imah-imah.
Depersenkeun pikeun tawis, cinta nyasat tanda soca, reh Tubagus Raksa tangtos, sapisahna sareng tuan, tinangtos kudu pindah, geus badami baris matuh, ngahiji jeung Ecep Tarlan.
Tuan Aspiran geus jangji, ka sobat Tubagus Raksa, saumurna moal poho, sarta dina unggal bulan, baris ngiriman surat, Tubagus Raksa nya kitu, jangji rek silih suratan.
Piisukeun baris ngalih, sadaya peryayi kota, pada sararumping kabeh, nyalametkeun nu rek mangkat, sakur anu ditilar, teu aya nu teu ngaheruk, pisah jeung tuan Aspiran.
Reh sakitu diparuji, tina kasaeanana, ka sakur ponggawa kabeh, sabar adil palamarta, metakeun kawajiban, rajin titi sungguh-sungguh, henteu aya kuciwana.
Sumawon enjingna deui, nu ka setatsiun jajap, ngaleut praperyayi kabeh, komo Tubagus Raksa mah, samemeh clak rek mangkat, tatabean silih rangkul, geugeut pada sosonoan.
Bujengkeun anu digurit, enggalna Tubagus Raksa, prantos ngalih bumen-bumen, sabumi jeung Ecep Tarlan, sami barubujangan, rukun saperti jeung dulur, sabagja jeung sacilaka.
Sapapait-samamanis, estuning silih belaan, saperti baheula bae, kacaturkeun hiji mangsa, dina keur waktu senang, pada caralik di payun, duaan babadamian.
Sanggeus cekel gawe sami, Cep Tarlan nyebatna engkang, Tubagus nya kitu keneh, nyebutna rai ka Tarlan, nyarita jeung babasan, ari anu dipicatur, nyarioskeun hal ibuna.
Anu eukeur munggah haji, waktuna kari sabulan, kana pisumpingeunna teh, saurna Tubagus Raksa, lamun taya halangan, engkang dina sasih payun, erek perlop baris mapag.
Ka ibu nu bade sumping, sarta lamun kawidian, rek saminggu lamina teh, sakalian meureun jajap, ka Sukasari teras, wireh prantos lima taun, jeung engkang henteu patepang.
