Engkang kangen liwat saking, kumaha mun enggeus tepang, ku engkang dicipta bae, lantaran teu ngabejaan, yen engkang masih aya, reh ibu mah enggeus tangtu, ka engkang nyangka geus ajal.
Malah engkang geus badami, nya eta jeung dulur engkang, kang Wiryadi bade perlop, ka Sukasari trus jajap, sakalian rek nyekar, ka makam mama di ditu, meureun tangtos sasarengan.
Meureun ibu mah geus pasti, ka Kang Wiryadi teu nyangka, yen dulur engkang nu kolot, tangtos galihna anjeunna, ka kang Wiryadi tea, tetep bakal mulung mantu, kumaha teuing engkena.
Lamun ibu geus tingali, kang Wiryadi dulur engkang, mana teuing kagetna teh, engkang erek nyariosan, engke lamun geus datang, ka lembur nuju karumpul, sanak kadang kulawarga.
Sasumpingna ka Batawi, diantep bae heulaan, moal rek rusuh nyarios, ceuk Cep Tarlan duh kumaha, rai ge hoyong terang, ningal tingkah polah ibu, mun sareng engkang geus tepang.
Sinareng pitaros rai, wireh rai Nyi Salamah, tangtos henteu jadi jodo, sareng kang Wiryadi tea, naha taya nu lian, ka ibu aya nu mundut, manawi engkang uninga.
Tubagus Raksa ngalahir, engkang henteu kenging beja, nanging rasa engkang tangtos asa teu aya petana, aya deui nu menta, Cep Tarlan deui ngawangsul, upami rempag mah engkang.
Kaleresan seneng galih, sarta teu aya pambengan, abdi hoyong gaduh bojo, kumaha kinten-kintenna, naha rai Salamah, engkang sareng tuang ibu, mun ka abdi ngarempagan.
Tubagus Raksa ngalahir, sarta anu semu bungah, keur mah memang ti bareto, parantos aya taksiran, anu dicita-cita, ngan Cep Tarlan nu kaemut, baris jodona Salamah.
DANGDANGGULA.
Engkang sukur rai aya galih, lamun yaktos mikersa Salamah, engkang sakalangkung atoh, eukeur mah ti kapungkur, saprantosna kawin teu jadi, sareng pun dulur tea, taya nu kaemut, ngan rai
