anu kacipta, pijodoeun sareng Salamah ngahiji, ngan engkang henteu wakca.
Atuh engkang sukur liwat saking, hal perkawis salira ibu mah, teu kedah deui ditaros, tinangtu pada rempug, pikir engkang mun rempag rai, ulah lami ngantosan, reh geus sampe umur, sareng bae sakalian, sasih payun perelop ka Sukasari, meungpeung sadaya aya.
Diri engkang sareng Kang Wiryadi, anu wajib kudu ngawalian, bareng papada perelop, tong ngurus utang-itung, dijadikeun bae sakali, kawin saaya-aya, keun engkang nu nanggung, bilih rai can sadia, hal eta mah entong rek dianggo galih, da sanes jeung nu lian.
Encep Tarlan saprantosna nguping, langkung-langkung kabungahanana, sarta dirempugan bae, maksudna geus panuju, urang bujeng anu digurit, geus dongkap ka waktuna, ka nu rek diburu, pada perlop babarengan, Encep Tarlan indit trus ka Sukasari, badami jeung ibuna.
Tubagus mah indit ka Batawi, ka ibuna baris mapag tea, jeung rakana geus pasondong, rakana oge kitu, geus permisi meunang paidin, perlop saminggu sewang, gancangna dicatur, isukna bareng marangkat, ka Pariuk geus dangdan papada ginding, rek marapag ibuna.
Di plabuan nyampak heurin usik, nu rek mapag campur kolot-budak, guyur ibur rame cekcok, ngaraleut tinglaliud, komo barang ngadenge pluit, tanda kapal rek datang, jelema pahibut, saayana anu mapag, panon kumpul paningalina ngahiji, mandang kapal nu datang.
Prapulisi ripuh mundar-mandir, henteu tahan ngajaga jelema, lumpat ngetan lumpat ngulon, hohoak jeung cacambuk, padedesek pameget-istri, pada paheula-heula, ningal nu rek jebul, kapal anu erek datang, raka-rai Tubagus Raksa Wiryadi, ngaradeg pangpayunna.
Teu diganggu ku para pulisi, reh Tubagus Raksa panganggona, saperti menak gegeden, gagah ginding jeung segut, nganggo dines teu tinggal peci, kebatna dirarapat, jasna hideung mulus, kancing
