Ieu kaca geus diuji baca
12
tanpa pamilih, minggat ti gědong kaputran.
- Disěbutkeun nirtja ti papagon Nabi, nusud tjeuk babasan, teu aja idin salaki, kaluar ti rumah tangga.
- Eta kitu manahna Dewi Pramanik, tungtungna mah tĕras, njuuh murubut tjitangis, kana pangkon Sang Pinutra.
- Bari njěbat abdi hĕnteu wantun teuing, ka lĕnggah gamparan, ngundjukkeun nu djadi awit, sangsara di djěro alas.
- Ajeuna mah gamparan teu kědah nungtik, abdi pang kieuna, anggur sae ge ngagalih, pikeun lulus ka pajunna.
- Radjaputra ngalahir ka Sang Pramanik, ih lamun kitu mah, Njai serong ka salaki, salingkuh teu tĕrus tĕrang.
- Djadi bohong tjatur manutan migusti, Njai teh ka ĕngkang, ajeuna katjiri bukti, siděm teu waktja balaka.
- Lamun kitu ĕngkang hĕnteu aja hasil, ka Njai bumela, sakanjĕri sakapeurih, sabagdja tur satjilaka.
- Ari Njai wani-wani rek sěmbuni, njumputkeun pěrkara, nu wadjib ĕngkang tingali, ka diri Njai sorangan.
- Hanteu lami ngawangsul Dewi Pramanik, abdi teh sumangga, ngundjukkeun nu djadi awit, pangna mios ti kaputran.
- Amung aja panuhun anu sajakti, ka lĕnggah gamparan, sewu-sewuning pamugi, djěmbar marga kasabaran.
- Mětik titi galih sipating sadjati, langgĕng kalenggangan, pĕrtiti andana wari, raratan tata kusumah.
- Tigin wěning mipit beutining raspati, agung kapahingan, Sang Radjaputra ngalahir, ĕngkang teu rek ngumbar hawa.
- Landjang-lindjing pusing lir anu teu eling, tjara kapandjingan, ku sipat rantjana iblis, tangtu pada njangka-njangka.
- Wuri² měntas kairid ku djurig, dikandar ku setan, disibat ku banaspati, dipirusa ku rasěksa.
- Pada nuding pusingna karandjing djurig, anu matak moal, ĕngkang kana ngumbar pikir, nu tilar reudjeung panalar.
- Hěmpek bae ulah dipundang-dipinding, tĕrangkeun ka engkang, pang Njai lunta ti nagri, njaksrak kana těmpat hina.
- Sang Pramanik dipaksa těras wawarti, undjukan nu tatag, dibarung mědal tjitangis, ti awit leungit Sang Putra.
- Nampi saur ti Radja nu langkung bĕngis, njeuseul seseepan, gěgědjlig djeung tĕras ngusir, ulah aja di nagara.
- Sarta dugi ka puntjak Gunung Sarinding, měndak kaanehan, ngaran kai Ragawati, ngomong djeung mere tuduhan.
