Ieu kaca geus diuji baca
15
utjul, tina sugrining tjětjěla.
- Mugi ulah dipigalih, menggah kalěpatan rama, kědah ibaratkeun bae, kana geusan etang-etang, njobi di kasabaran, mikukuh mundjung rahaju, pupudja kana waluja.
- Radjaputra henteu lami, ka rai ladjěng ngandika, alon sarta sěmu lungse, ih Njai sanadjan ĕngkang, henteu aja pikiran, rek ngulur njadjudjur napsu, ngahina tjonggah ka sěpah.
- Ngan maksud teh moal balik, rek mukim di Gurangsarak, nulujkeun ngalap pangartos, nu tatjan aja di engkang, kitu ge lamun sadrah, Njai asih nu satuhu, kěrěsa njandak ka ĕngkang.
- Tapi mun Njai teu sudi, dituturkeun mah ku ĕngkang, ĕngkang rek ka mana bae, pikeun njalajakeun rasa, neangan kasirnaan, Dewi Pramanik ngawangsul, masja Allah adat anjar.
- Bět sieun teu dipisudi, salěmpang teu dipisuka, aja saur bade ngablon, raos ku dumeh geus lampar, uninga Padjarangan, rek tunggu si Bungbungumur, pedah geus aja tjeungtjeuman.
- Sang Radjaputra ngalahir, bět teu njaho-njaho atjan, waka disangka ditaroh, mun rek oge maksud ĕngkang, nuturkeun Nji Manetja, Dewi Pramanik gumuju, ngadangu saur Sang Putra.
- Pursita nja kitu deui, gumuju nu lintang genah, ngupingkeun saur Sang Anom, Manetji sareng Manetja, wungkul peupeureudeujan, gulak-gilěk umat-imut, tjara biwir kuda heuaj.
- Pandjang lamunna ditulis, pěrtata Putri djeung Putra, harita tětěp matamon, di bumina Sang Pandita, Pursita ngarentjangan, ngawulaan ka Sang Sunu, sareng Manetji Manetja.
- Gantjangna anu digurit, Sang Putra Purnama Alam, dikira geus tudjuh poe, linggihna di Ragatoja, sartana sakalintang, nandangan kabingah kalbu, anu teu aja hinggana.
- Lěbět ka basa kiwari, estu kumpul pangatjian, Pramanik sareng Sang Anom, sagaraning kasonoan, dina waktu harita, suwung geusaning kaliwung, ilang soreang kabingbang.
- Asihna leuwih ti tadi, wělas leuwih ti baheula, sono leuwih ti bareto, kawuwuh nu karungrungan, agěng marga timbangan, sarta harita keur nudju, Radjaputra sareng garwa.
- Ngadeuheusan ka Sang Rěsi, di bale latar madrasah, kěrsana guněm tjarios, teu lami Sang Radjaputra, piundjuk ka Pandita, kawuwuh tindak nu lungguh, teu kěndat hormat tilawat.
- Putra lintang laksa-kěti, emutan ku kanuhunan, dibobot moal kabobot, nampi pangasih piwělas, ama ka diri putra, kěrěsa mangkon
