Ieu kaca geus divalidasi
16
miugung, ngahandjatkeun tina bahja.
- Dumugi kana walagri, kalajan kadaring Allah, tumobros tina prihatos, anu sakieu raosna, dina waktos ajeuna, sumurup margi rahaju, waluja nu lintang mulja.
- Mung djadi tibalik pikir, naon di ahiring mangsa, pikeun ngangsulan rumaos, putra ka kěrěsa ama, marga karumaosan, kahutangan susun susun, teu aja wilanganana.
- Ngalahir Sang Maha Rěsi, bo Agan menggah ama mah, estu teu pisan rumaos, gaduh hak gawe nulungan, ngahandjatkeun ti bahja, amung Allah anu agung, anu hak asih ka Agan.
- Saupami aja galih, majar malěs kasaean, tina ku agěng rumaos,pamugi ulah ka ama, kědah ka Gusti Allah, babakti anu satuhu, njandak pěrtata agama.
- Djalan babakti ka Gusti, mulangkeun karumaosan, kědah waspaos pribados, wintjikan raga djeung njawa, usik malik ku saha, maphum kana udjung puhu, babaraning sadjatina.
**
Dangdanggula
- Radjaputra ngadangu panglahir, ti Sang Rěsi kalintang isinna,marga sumĕrěp karaos, kana lěběting kalbu, pamaksadan lahiran Rěsi,sugri nja panarima, kudu ka Jang Agung, Pangeran murba wisesa, nu kagungan pĕrsipat rahman djeung rahim, djalan kasampurnaan.
- Těras deui Sang Rěsi ngalahir, sinarengan ama aja maksad, dipitjeungtjeum ti bareto, gumantěng tur gumantung, siangwěngi teu leungit-leungit, emutan hajang geura, laksana nja maksud, wirehing ieu pun anak, wasta Dewi Pursita anu sajakti, maksad ama ajeuna.
- Saupami Agan sareng rai, kĕrsa mulih pun anak sumangga, tjandak kědah daměl gandek, kalajan nu satuhu, ati ama sadrah teh teuing, dina lahir-batinna, pasrah nu saestu, manawi aja damělna, djuru bětěk sasapu djeung běběrěsih, ngadjagi piwarangan.
- Amung kědah diwuruk dipěrih, tata-titi babasan nagara, tindak gandek di karaton, margi pun anak estu, sagělarna di alam lahir, teu atjan pisan ngambah, ngadjadjah lumantung, di lěbět kota nagara, djadi sěpi pangarti babaran puri, tata babasan menak.
- Eta maksad ama mugi-mugi, dikabulkeun ku kěrěsa Agan, sarěng ku rai sajaktos, sakitu nja panuhun, saupami henteu katampi, tawis
