Ieu kaca geus diuji baca
17
taja piwělas, ka ama nu istu, Sang Radjaputra Purnama, teu ngawangsul tumungkul pajuneun Rěsi, ewuh lěběting manah.
- Anu djadi pangëwuhna galih, tina ningal sakitu asihna, digunggung sarta dimongmong, Pursita ku Sang Wiku, ku pangira Sang Putra tadi, estu teu aja pěta, kěrěsa padjauh, lantaran tina njaahna, ari ieu udjug-udjug ledjar galih, njerenkeun ka andjeunna.
- Dikudukeun sina ngiring-ngiring, dipětakeun kana gawe hina, djuru bětěk eusi pawon, kitu manah Sang Sunu, ngan garwana Dewi Pramanik, ngawangsul ka Pandita, rebu-rebu nuhun, wirehing kěrĕsa ama, sětya galih ka putra anu sajakti, djembar kapěrtjantěnan.
- Lědjar galih masihkeun pun adi, Njai Dewi Pursita ka putra, kědah dibabantun mios, putra teh sakalangkung, kabingahan teu aja tanding, kalajan nampi pisan, sumědja dibantun, malah-malah ti tadina, gaduh pikir ulah patilar patěbih, teu pěgat rerentetan.
- Sakawasa didjaring diaping, rek didaměl dulur sajaktosna, sasaka sapantjěr tulen, moal dituduh-tuduh, kana daměl nu teu pĕrjogi, těgěsna sipat hina, anu dipisaur, djuru bětěk běbětekan, sědja bade didaměl djimat paripih, keur tjonto kasemahan.
- Radjaputra ka rai ngalahir, rēmpug pisan reudjeung ati kakang, hade urang bawa bae, sugan bae tiněmu, sareng takdir ti Maha Sutji, urang kawalujaan, dikabul nja maksud, njěkělan gawe pusaka, urang djieun gurita pameung keut ati, urang nagri Ambarak.
- Sang Pursita imut tina ngarti, silib sindir Sang Radja Pinutra, harewos ngagondjak bae, gantjangna nu ditjatur, Maha Rěsi ngalahir deui, ka Pangeran Pinutra, ama rek pihatur, kalajan mugi dianggap, kĕrsa kana ngadjalankeun nu sajakti, kana panuhun ama.
- Ulah waka Agan enggal mulih, ka nagari karaton Riskomar, kědah njimpang heula bae, ka puntjakna Sirkawur, malah kědah di dinja linggih, di Turna pangěbonan, pagunungan luhur, balukarna hanteu kědah, dipiundjuk engke oge katingali, djalan kawiludjěngan.
- Ti Sirkawur ulah waka mulih, lamun tatjan aja anu dongkap, wajahna kěrěsa ngantos, ama teh mung sakitu, panuhunan mugi katampi, ulah hanteu kěrěsa ngadjugdjug Sirkawur, ngawangsul Sang Radjaputra, měnggah putra sumědja tumut teh teuing, kana dawuhan ama.
- Sumawontěn siang nadjan wěngi, ku putra teh dikambangkeun pisan, sarěng mo dimore-more, amung putra panuhun, manawina maparin idin, maksad rek enggal-enggal, ka Gunung Sirkawur, malah upami ngidinan, hajang mios putra teh di dintěn endjing, Pandita ngawalonan.
Purnama Alam II
