Koelitna kanděl katjida sarta kasar karadak sapěrti tjampědak, djeung dina sela-selana koelit noe bareulah sok bilatoengan. Boeloena baradag sarta hareuras tapi tjarang. Ari tjitjingna dina tanah noe betjek sarta reja leutakan, da manehna resepeun pisan goejang, Kitoe deui hiroepna tara ngaboeboehan saperti gadjah, pangreja-rejana ngan oekoer tiloe. Ari tjitjingna di padataran goenoeng, dina leuweung noe soenji, noe teu kasaba koe djalma. Di dinja sok kapanggih tapakna gěde sarta djěro, da awakna beurat pisan.
Ari kahakanan badak nja eta dangdaoenan, dahan-dahan djeung tatangkalan noe laleutik.
Si Kasim: „Koemaha ari soekoena, tjara soekoe moending aja tjekeran?”
Si Ardjan: „Hěnteu, ari badak mah tjara koeda aja talapokan, tapi dina hidji soekoe aja tiloe talapok ngarijoeng djadi hidji.”
Si Kasim: „Naha ěnja ari badak sok ditoempakan poetri ?”
Si Ardjan: „Ari bedja ti noe sedjen mah ěnja kitoe, ari tjek bapa mah henteu, karana bapa oge mindeng nendjo badak, tapi tatjan manggih poetri hidji-hidji atjan.”
XXVIII. BOEDAK BAGEUR.
Si Djoemin boedak miskin, tapi bageur. Ari gawena roepa-roepa: aja ngangon domba, ngarit, matjoel di sawah bapana djeung reja-reja deui. Kabeh pagawean, sakoer noe ditoedoehkeun koe bapana, tara dipoengpang ditoeroet bae.
