Ieu kaca geus divalidasi
98
- Ki Pamitra njĕmbah matoer, moegi agoeng djijad goesti, kadjawi djijad gamparan, noe ditĕda beurang peuting, moegi estoe koemawoela, ka raji gamparan goesti.
- Sokadana tambah gĕmoeh, para mantri woewoeh soedi, pra ponggawa woewoeh soeka, soemawon para boepati, patih djeung radja magawan, doewanana pada ngaping.
- Asih nagara diatoer, oepĕti dibagi-bagi, didamĕl lima doeoeman, sadoeoeman ka kipatih, doewa bagijan ka radja, noe doewa bagijan deui.
- Di asta koe radja sĕpoeh, sang praboe sĕpoeh geus njingkir, tjalik di babakan anjar, sĕnang ngahĕnang-ngahĕning, katjatoer sang praboe Tjĕmpa, ngadeuheus pamit rek moelih.
- Ngadeuheus ka radja sĕpoeh, praboe Dewabrata ngiring, sarĕng djeung garwa-garwana, sadaja ĕnggeus tjaralik, ngandika praboe bagawan, ama ngeunah teuing pikir.
- Ningal maneh doewa praboe, panĕda ama ka goesti, ka noe moerba noe wisesa, noe ngadamĕl boemi langit, masing loeloes roentoet pisan, sakait reudjeung pangampih.
- Kadjeun nagara padjaoeh, sok moen padeukeut nja pikir, oepama boga kasoesah, koedoe sili toeloeng diri, djeung pada sili bedjaän, poma agoes sing areling.
- Doewanana njĕmbah matoer, soemoehoen timbalan goesti, sĕdja diestikeun pisan, sapiwoeroek mowal lali, sarĕng taja noe disĕdja, ngan hibar gamparan goesti.
- Sarĕng praboe Tjĕmpa matoer, noen manawa idin goesti, sim koering pamit rek moelang, rada hawatos nja pikir, geus lami tilar nagara, manawi aja prakawis.
- Kangdjĕng praboe sĕpoeh njaoer, agoes nja hade teh teuing, geus lawas tinggal nagara, boeroe-boeroe beurang-peuting, wantoe-wantoe djĕnĕng anjar, pageto agoes nja indit.
- Nji Sĕkarkantjana njaoer, ajeuna koetan rek moelih, iboe sono keneh pisan, ka andjeun reudjeung ka njai, tapi dalah di koemaha, anggoer sae mangke deui.
