Ieu kaca geus divalidasi
99
- Wantoening noe djĕnĕng ratoe, reja kabeurat karisi, soemawon moen masih anjar, reja kasĕmang kainggis, wajahna sono ditahan, soegan parĕng mangke deui.
- Ladjeung taroewang ngarijoeng, saämbĕng pamĕgĕt istri, tiloe radja sarĕng garwa, langkoeng soeka-manah goesti, ngarijoeng djeung para poetra, sanggeus toewang pamit moelih.
- Sri Dewabarata njaoer, ka Pandji Pamitra patih, he kakang patih ajeuna, geura miwarang tjatjawis, rehna kakang praboe Tjĕmpa, pageto ngĕrsakeun moelih.
- Sakabeh para toemĕnggoeng, oelah aja anoe kari, oerang ngadjadjapkeun kakang, sarĕng djeung koela pribadi, sarta dongkap ka plaboewan, ki patih matoer ka goesti.
- Soemangga sakĕrsa praboe, djisim koering rek tjatjawis, ngadawoehkeun satimbalan, samemeh aja pilahir, abdi-abdi geus sajaga, ngantosan timbalan goesti.
- Kotjapkeun dongkap ka waktoe, isoek-isoek geus tarapti, para ponggawa sadaja, parabot ĕnggeus ngabaris, oemboel-oemboel djeung bandrangan, lawe rontek hanteu kari.
- Geus pinoeh di aloen-aloen, djĕlĕma heurin koe bitis, malah geus leber ka pasar, pinoeh latar pantjaniti, koe istri para ponggawa, soemĕdja moendjoeng ka goesti.
- Ladjĕng radja Tjĕmpa moendjoeng, ka rama hormat teh teuing, sarĕng ka patih bagawan, djeung ka iboe prameswari, nji ratoe Sĕkarkantjana, kotjejak nangis ngadjĕrit.
- Tina tatjan warĕg tĕpoeng, wantoe-wantoe watĕk istri, istri-istri anoe reja, soemĕgroek mariloe nangis, soemawon pawarang Tjĕmpa, nangis koe bawaning kĕtir.
- Sang radja bagawan njaoer, ĕnggeus njai oelah tjeurik, anggoer djaga oerang ngandjang, sarta adatna lalaki, ngoembara njijar kamoeljan, tinggal asal moro asil.
- Di Tjĕmpa mah ĕnggeus tangtoe, oentoeng liwat tina asil, karadjaän Sokadana, ti dinja nangisna lilir, ratoe prameswari Tjĕmpa, ladjĕng bae nitih djoli.
* D
