kolot, tangtu ku aing dirangket, naon ku sia nu dipake dir teh, eta sia boga ua beunghar, pedah cicing di dinya, nu dipake gede gunung panaggeuhan teh?"
31. GENTENG-GENTENG ULAH POTONG
Hartina : ulah pot pisan.
Ambu Sumi jelema gemi, bisa ngajajadikeun barang saeutik, ari lanjangna ngaran Narsi, jelema jebrol, lamun barangbeuli kudu loba, ngejo kudu gede.
Hiji poe si Narsi dititah ngisikan, carek si Narsi, "Juragan, abong ngisikan teh moal cekap."
Wangsul ambu Sumi, "Hih Narsi, aing geus teu pati rea beas, wayahna bae saeutik-saeutik oge, supaya mayeng, najan direaan, kumaha mangke ari teu mahi, tangtu pot pisan, moal ngejo, ayeuna jig bae geura isikan, urang mah genteng-genteng ulah potong bae."
32. GEDE-GEDE KAYU RANDU, DIPAKE PAMIKUL
BENGKUNG, DIPAKE LINCAR SOK ANGGANG
DIPAKE PANCIR NGAJEDIG
Hartina : jelema gede luhur oge, taya gunana, kana gawe teu daek jeung teu bisa, diarah kabedasanana da hengker, diarah tegepna da goreng patut.
Si Ambrun jelema jangkung gede, teuing ku mumulan, manehna bubujang di mandor gudang, lamun isuk-isuk, sina sasapu jeung beberesih pakarangan, digawena ngan ukur bae aya tapak sapu, dititah ngamandian kuda, kuda teh asal baseuh bae, da beresih mah henteu, jeung loba deui teu pikaresepeun juraganana, jadi cicingna di mandor gudang, percumah bae, da nyatu mah kudu seubeuh.
