Si Sarman datang ka Ibu Uci bari mamawa totopong weuteuh, pokna, "Ibu, ieu kuring meuli totopong ti pasar dua likur ketip: lah, aya kabeneran."
Ibu Uci; "Nya, sabehan mah jiga alus naker, matak kabita, geura ku maneh teges-teges, ieu teh lamun di jelama mah, geulis sisi, laur gunung sonagar huma."
Atawa :
Teu acan saminggu, Nyi Puta diserahkeunana ku salakina, geus meunang beja, yen salakina geus nikah deui ka nu sejen.
Pasosore poe Senen, Nyi Puta ditanya ku Nyi Misah pokna, "Nyai, bejana tuang raka geus nikah deui, na enya?"
Wangsulna, "Enya, ka Si Nirem ; wah, teu panas geulis ge geulis sisi, laur gunung, sonagar huma."
35. HEUEUH-HEUEUH BUEUK
Hartina : ngarempugan henteu saenyana (henteu terus jeung ati).
Nyi Serom ngahaja datang ka Nyi Kepek, pokna, "Kepek, ari kami ku teu resep nenjo pamolah Si Siti, geura ana leumpang teh, aya gumeulis, jeung jeba-jebi, cetaan teh dibeakeun ku sorangan."
Kepek, "Enya bener."
Serom, "Jeung eta, kami mah teu resep goreng cacapek, da lamun baraya kami mah kitu, meureun geus diwarah."
Kepek, "Heueuh, naha sok diantep bae ku kolotna."
Serom, "Meureun diantep, mana sakitu oge."
Eta omongan kitu nepi ka Nyi Siti, Nyi Siti geuwat datang ka Nyi Kepek pokna, "Eteh! bejana Si Serom jeung Eteh, ngomongkeun kuring?"
Kepek, "Hih, montong sok ngagugu panyerewedan, ari
