Ieu kaca geus divalidasi
109
- Saupami balad tos kumpul, parios saha nu wani, suka rela majeng pupuh, mun teu wantun sina balik, tong dipaksa kanggo naon.
- Lajeng kondur den patih ka alun-alun, nakol bende langkung tarik, geunjleung sorana ngaguruh, geus darangdan parajurit, samakta kabeh parabot.
- Nyoren gobang kuli tumbak sareng limpung, di alun-alun geus heurin, lajeng den patih ngadawuh, he sadaya palajurit, saha bae anu tanggoh.
- Anu wani kana perang pupuh, urang keur dilurug jurit, ti ratu pamukti angun, saha bae nu teu wani, ulah milu karerempon.
- Lamun wani hayu buru-buru maju, anu teu wani baralik, sadaya sangem rerempon .
- Pek ngabela lemah cai moal mundur, sanaos dugi ka mati, den patih ngawalon sukur, he sadaya palajurit, ayeuna urang marios .
- Lajeng budal ti alun-alun ngaguruh, surakna pating jaleritka wates kota geus cunduk, seug marentah raden patih, nyieun pasanggrahan cek-cok.
- Kitu deui balad ratu angun-angun, nyieun pasanggrahan sami, ngaberes kabeh aralus , ngajajar mani baris, papanggungan geus ngabangong .
- Isuk geus rap banderana ngempur, tawis kaagungan nagri bandera beureum, ciciren ngayonan jurit, da puguh pada jarago.
- Geus ngabaris beberapa kabeh sardadu, semah katut piribumi, dipirig ku sora tambur matak kelar rebut pati, bedil sorana geus dur dor.
