Tingbelehem pada seuri, di dapur ager-ageran, wireh Ujang Salim wanter, sonagar henteu eraan, tuluy gurudug datang, sinyoh nu lembut ti payun, ka Jang Salim tatabean.
Salim tabe bari seuri, tuluy sinyoh ngalendotan, ku Salim dipangku bae, sarta bari diusapan, siga wawuh geus lila, Ujang Salim ge nya kitu, geus teu aya asa-asa.
Ka Salim pada arasih, watek beresih hatena, Salim ge nya kitu keneh, conggah teu aya kaera, watek sae nyonyana, welas asih lungguh timpuh, miasih ka kabeh bujang.
Eusi bumi wedi asih, saregep kumawulana, taya nu satengah hate, nurub cupu jeung rakana, sami pada saena, balabah tukang tutulung, asih ka sagala bangsa.
Wantu ahli Tiosopi, getol ngulik kabatinan, watekna geten-tulaten, sabar tara barangasan, sipatna kamanusan, di istri-pameget kumpul, nurun ka para putrana.
Sareseh budi maranis, hade tata hade basa, kumaha sepuhna bae, ninggang kana paribasa, nu geus jadi carita, uyah teu tees ka luhur, anak merak kukuncungan.
Sabab eta Ujang Salim, salila matuh di dinya, pinuh ku kasenang hate, saregep kumawulana, teu aya bengkok sembah, getol rajin sarta suhud, ngurus kana pagawean.
Teu kosi dititah deui, teu ara tunggu parentah, gawe luar gawe jero, teu susah diutuh-etah, najan lain cabakna, gawe dapur milu campur, masak kekeduk kukumbah.
Beberes jeung beberesih, di luar reujeung di imah, gawe kebon gawe jongos, teu itungan sisirikan, saha bae nu nitah, lian ti gawe nu tangtu, tara bosenan sungkanan.
Gawena anu maranti, ngatik sinyoh pangalitna, ku Salim leuwih diraneh, asih siga ka dulurna, pake inggis kareuwas, diogo diugung-ugung, dienod didama-dama.
Diatik diati-ati, lamun nganteur ka sakola, estu digedeng dikaleng, dijaga reujeung peryoga, ibu rawuh ramana, ningal lampah Salim kitu, nyaah asih teu satengah.
