Ieu kaca geus divalidasi
180
- Ngagidir bawaning gimir, tungkul hanteu ngawangsulan, tjara nu ngadjublěg bae, pajuneun Ratna Suminar, biritna kokoplokan, sarta beser mani ngutjur, ngan hanteu kaborosotan.
- Katjatur Dewi Pramanik, ningal nu keur kapusingan, rai Sang Ratu Pinutren, tumungkul hanteu ngandika, ngan wungkul tjumalimba, hanteu lami těras njaur, ka Ki Mantri Padjarangan.
- Naha atuh bongan teuing, paman mah bět taja tata, milampah maling-salah top, lamun diri kaula mah, nu dipaling ku paman, dibawa ka bumi pitu, didjieun putri narpatya.
- Dipake tumbal nagari, paměgat kana baruntak, ngadjatnika di kuputren, diugung sarta dihormat, didjieun sipat djimat, ngaratuan Bungbungumur, di bandjar karang panjiksan.
- Tangtu moal kieu diri, luluntaan njaksrak alas, leumpang ripuh ampir mopo, hanteu bisa gagantjangan, da puguh nintjak lěmah, tina hanteu bisa ngapung, djalan kana djumantara.
- Kula bagdja mun dipaling, tinangtu djadi santosa, loba elmuning kasakten, kawantu djadi kadjinan, sok unggul ti manusa, sabab boga sipat lembut, lain raraganing kasar.
- Kadua pěrkara deui, lamun kula dipaling mah, tangtu bae bisa amprok, reudjeung Pangeran Pinutra, anu keur djadi artja, meureun kula bisa nulung, nambakeun ka kamanusan.
- Katilu pěrkara deui, Sang Sri Maha Saksaria, moal sagawajah bae, pangna nimbalan ka paman, maling těrah manusa, kukutan keur putra pulung, maunat Purnama Alam.
- Jen bakal manggih balai, linggih dina padjarangan, djadi artja kadjadjaden, moal aja anu bisa, nulung ka Sang Pinutra, mun hanteu ku nu kadujung, kukutan Sang Saksaria.
- Ngan ajeuna kula leuwih, boga pikir djadi naha, mun Sang Saksaria Katong, hanteu ngukut kamanusan, anu bakal melaan, kadangkala těrus lampus, Sang Putra di padjarangan.
- Tangtu kula moal manggih, bedja ajana Sang Putra, da puguh taja nu njaho, mungguh bangsa manusa mah, nagri Tolongtělěngan, ajeuna aja pitulung, sidik ajana Sang Putra.
- Kula nuhun laksa kěti, kana pitulunganana, Maha Saksaria katong, ku asal aja kěrsana, ngukut putra manusa, nu bakal ngaběndung ewuh, panulak kana baruntak.
- Meureun ku paman kapikir, geuning buktina ajeuna, di djěro bandjar guha teh, kataradjang sangar panas, nu taja papadana, anak-anak kana tumpur, nagara Tolongtělěngan.
