Poesaka Soenda 1922-12-1(06)

by Pagoejoeban Java-Instituut

Poesaka Soenda 1922-12-1(06)  (1922)  by Pagoejoeban Java-Instituut

[ 81 ]

POESAKA-SOENDA

DIKALOEARKEUN KOE PAGOEJOEBAN

:-: JAVA-INSTITUUT  :-:

Anoe djadi Redactie: Dr. R. A. HOESEIN DJAJADININGRAT
J. KATS, M. SOERIADIRADJA

TOEDJOEL SERAT : - GOENOENG SARI 84. – WELTEVREDEN

Eusina nommer 6

1	Wajang	katja	81
2	Babad Padjadjaran	"	83
3	Kagegelan ti M. Ardiwinata M. G. Madjalaja	"	86
4	Paririmbon	"	89
5	Sair Soenda	"	91
6	Goegoeritan Tjitamiang Soemedang	"	92
7	Wawatjan Siliwangi	"	92
8	Artos langganan	"	95

---

W A J A N G
Beunang njoetat tina boekoe karangan toean J. Kats

II.

Asal-asalna djeung wandana lalakon wajang.

Baheula di tanah Hindoe geus djadi adat, lamoen aja radja anoe rèk njoegoeh, sasadjèn gedè ngorbankeun koeda (paardenoffer), ti pisataoeneun deui kana prakna, oenggal poè teu aja kendatna koedoe baè moengpoeng anoe poepoedjian kakawihan, ngalap berekah para Dèwata djeung para loeloehoerna anoe katjeloek lalepoes.

Poepoedjian djeung kakawihan kitoe tèh, lian ti dina sasadiaan pikeun sasadjèn gedè tèa, nja dina gawè sèdjèn ogè radjeun digedèkeun. Saperti oepama aja anoe kapapatènan, koelawarga djeung sanak kadang anoe ninggal tea, sok rioeng moengpoeloeng di handapeun kakajon anoe ijoeh, ngaradon poepoedjian kakawihan dibaroeng koe biantara tjarita lalakon anoe baheula, maksoedna silih beberah silih leledjar sangkan palèr ka noe tilar. Bintara tjarita koena tèa disareboetna: itihasa; âkhijana; poerana. Tapi ari dina tarèkah toelak bala mah lain kitoe petana, ieu mah koedoe mangkoe hawoe ka loear, der mariroeha ngadadak mariroen seuneu, ngalingkoeng ngepoeng noe ngeloen sapiri-oempina, bari teu rèpèh ngarawih, poepoedjianana itihasa djeung poerana tèa, silih tèmpas silih tèma, tarabah djeung lalantjar pisan.

Koe lantaran kabiasaan anoe kitoe, èta djadi panarik kana rekah tambah nerekabna djeung kana hiroepna tjarita djeung dongèng-dongèng, nepi ka dina alam Boeddha — 500 taoen samèmèh K. Nabi Isa — rèana tjarita noe biasa djadi katjapangan harita, tanpa wilanganana, aja anoe [ 82 ]didangding aja sair aja anoe lantjaren baè.

Poepoedjian djeung kakawihan anoe gelar djadi lalakon titinggal Hindoe mangsa harita, aja doea anoe natrat teu aja pegatna anoe eusina djeung iketanana tjarita, étjés némbrés babaran djaman baheula. Anoe ka hidji tjarita Mahabharata, nja èta lalakon perangna toeroenan Bharata; ari anoe kadoea tjarita Ramaijana, nja èta lalakon Batara Rama.

Tjarita anoe ka hidji tèa dibagi bagi djadi sababaraha bagian sareng pandjang lain dikieuna, eusina lalakon déwa-déwa djeung lalakon poetra-poetra Pandoe anoe biasa diseboet Pandawa-lilima, lalakon perangna djeung sadarék misanna anoe diseboet Korawa tèa babakoona mah,

Kieu ringkesna èta tjarila Mahdbharata tèh.

Anoe djadi radja di Astinapoera — dajeuh gadjak hartina — djenenganana Santanoe, toeroenan Koeroe. Ratoe Santanoe tèh geus kogoengan garwa malah geus kagoengan poetra pamegat djenenganana Bisma. Tapi dina hidji mangsa andjeunna ningali (tepang) djeung hidji poetri geulis taja babandinganana djenenganana Poetri Satijawati anoe biasa disareboet Doergundini atawa Nji Lara Amis — (Amis basa Djawa, Soendana hanjir, anoe matak dilandi Nji Lara Amis sabab èta poetri salirana baoe hanjir). Radja Santanoe kapintjoet, toeloej Satijawati ditanjaan. Poetri Doergandini kersaeun, ngan aja tandjakanana, nja èta sing iasa noeroenkeun poetra anoe pinoeloejkeuneun djadi ratoe.

Bisma, poetra Santanoe anoe tjikal tèa, katjida moeljana manah nadjan andjeunna oeninga jén andjeunna anoe koedoe nampi waris djadi Pangéran-Anom, tapi ngéléhan manéh sarta djangdji moal kagoengan garwa, sabab bisi kagoengan poetra anoe hojong nampa poesaka karadjaan milik andjeunna.

Poetri Satijawati tèa oge geus kagoengan poetra pameget ti Palasura, djenenganana Abiasa. Ajeuna ti Ratoe Santanoe poetraan deui pameget doea, nja èta Tjitranggada sareng Tjitraséna, anoe koengsi djaradi radja ngagentos ramana. Tapi doeanana gaboeg, pada teu karagoengan poetra.

Noemoetkeun adat ageman didinja, Satijawati anoe katinggal poepoes koe tjarogé tèh koedoe diwariskeun djadi milik sadérék tjarogéna anoe poepoes tèa. Nja Satijawati ragrag ka Wijasa, sadérék Santanoe, anoe keur tapa diadi pandita.

Ti Wijasa, poetri Satijawati kagoengan poetra pameget doea, anoe hidji djenenganana Dasarata (Dhretarasjtra) anoe hidji deui Pandoe. Koe margi Dasarata lolong, nja Pandoe anoe diangkat djadi radja.

Pandoe kagoengan poetra ti Déwi Koenti tilue, sadajana pameget hidji Joedistira atawa Poentadéwa (di dieu biasa diseboet Semihadji), doea Bima at. Wrekodara at. Brataséna, anoe ka tiloe Ardjoena at. Djanaka at. Pamédi at. Parta. Ti poetri Madri kagoengan poetra doea nja èta Nakoela sareng Sadéwa.

Saméméh kagoengan poetra ti Pandoe, Dewi Koenti tèh geus kagoengan poetra pameget ti Batara Soerja djenenganana Karna.

Ari Dasarata garwaanana ka Dewi Gandhari kagoengan poetra saratoes, pameget sadajana, anoe mashoor diseboet Korawa tèa, nja èta Doerjadana (Soejoedana) Doersasana, Doermagati, Tjitraksa, Tjitraksi dj. s. t.

Sapoepoesna Pandoe, anoe ngagentos djadi radja tèh, nja Dasarata anoe lolong tèa.

Poetra-poetra Pandoe anoe lima djeung para poetrana kue Dasarata sina sakoemboeh diwoeroek sareng diatik koe hidji pandita.

Tapi èta maroerangkali, Pandawa lilima sareng Korawa tèa, teu aja pisan rapihna salawasna getréng bae, tepi ka petjohna ger parasea toengtoengna mah.

Korawa pada ihtiar naréangan akal koekadjoeligan koe kadengkian pikeun ngabasmi toeroenan Pandawa, tapi weléh henteu mental akalna koe djalan èta mah.

Toengtoengna koe djoelig dengkina Sangkoeni, doeloerna Gandari, Pandawa kabeunangan, lantaran disina ngadoe (maen toempangan). Anoe ngadoena Doerjadana djeung Joedistira (Semihadji tèa), dibarobotohan koe saréréa. [ 83 ]Koe sabab èlèh pelit èlèh litjik. Pandawa lilima nja élèh, tepi ka moeloentoe ngagilintjing pisan, geus soemawonna banda, radjakaja tatah-wadoeng poesakana tèa, dalah kamerdikaan silirana ogé, sèèp sadaja dianggo toempang. Nja sasadèrèk-sadèrèk koedoe ingkah ti nagara. Doea welas taoen lilana poetra Pandawa pating alasroek lantaran di boeboerak koe misanna.

Katiloe-welas taoenna Poetra Pandawa njalalamoer, masrahkeun salira koemawoela ka Radja Wirata, anoe ngerèh karadjaan Matsija.

Satoetoegna nyalakonan hoekoeman, anoe dianggo toempang ngaben tèa, Poetra Pandawa nagih waris, mènta poesaka nagara sabeulah ka Doerjadana. Lantaran henteu dikaboel panoehoenna, welèh teu beunang dibèbèrès, nja toengtoengna der perang. Dalapan welas poè lilana Pandawa njekel saboek milang tatoe lali rabi tegang pati ngajonan oerang Korawa, nepi ka moesoeh anoe miloe perang poepoeh tjarem sadajana, Korawa kadèsèh; oerang Pandawa oenggoel perangna toeloej Goedhisjthira (Semihadji) didjoengdjoeng loenggoeh njepeng kakawasaan nagara.

Doepi éta lalakon Mahabarata tèh sakoemaha anoe parantos ditjarioskeun tadi, èstoe tjarios pandjang pisan, djadi dalapan welas boekoe anoe karandel, anoe dingaranan Parwa, sadajana dieusi 100.000 (saratoes rèboe) padalisan.

Eta tjarita anoe sakitoe pandjangna tèh, ditambah koe sosompang djeung sempalanana, toeroen-toemoeroen natrat teu aja kendatna, tibaheula tepi ka ajeuna pisan.

Dina boeboekana èta boekoe-boekoe tèa, aja saoer noe ngatoerna kieu oengelna:

„Soegri anoe miroetjaan ngadangoe ien lalakon, tanwandè itjal tingalna tina tjarita noe lian, katoengkoel koe pangiroetna iketan bagbagan tjarita Mahabarata noe nembè njèrep soeroep kana pangroengoe, lir djalma noe kagendam koe ngelakna soara (titiran), ana kasorang kaselang koe sora sakadang gagak, njiliwoeri ngiring ngadjombali, rasa resag sareukseuk asa raroengseb”.

Tah sakitoe diloehoengkeunana dipoendjoelkeunana tjarita Mehabarata tèh koe oerang Hindoe ti djaman boehoen kènèh. Demi anoe djadi panambah sesembèn tjarita Hariwangsja diseboetna, saperti lalakon-lalakon Kresna, ieu ogè lain loemajan. (Kokila tèh manoek, moen di oerang mah titiran anoe disadana katjida dipikaresepna, lantaran sorana soeroep kana lelemboetan, bèdjana aja teroesanana kana élmoe roetjalan raga).

Demi parèlèanana eusina èta anoe dalapan welas parwa tèh njaritakeun lalakon-lalakon anoe ditataan ieu di handap.

1. Babad koena. Lalakon Pandawa sareng Korawa eukeurna pada nonaman...Adiparwa
2. Lalakon Pandawa kataradjang bahla nandang sangsara... . Sabhâparwa.
3. Lalakon poetra Pandawa di pangboeangan .... Wanaperwa sareng Wirâtaparwa.
4. Lalakon anoe ngalantarankeun djadi perang gedè .... Oedijogaparwa.
5. Lalakon pèrang Baratajoeda ....Bhismaparwa; Dronaparwa; Karnaparwa; Sjaljaparwa; Sauptikaparwa; Strîparwa; Sjântiparwa; Anoesjasanaparwa.
6. Panoetoep .... Asjwamedikhaparwa; Asjramawdsikaparwa; Mausalaparwa; Prastkanikaparwa; Swargarohanakaparwa,

Aja samboenganana.

---

Babad Padjadjaran

Tjoektjroekanana anoe nganjatakeun kaajaan sareng perenah-perenahna karadjaan di tanah Pasoendan djaman baheula, tepi ka ajeuna teu atjan aja anoe tiasa mastikeun pisan. (Tingali P.S. No. 5).

Soepados djadi timbangan ka sadaja anoe maraos Poesaka Soenda, kaèmoet, djadi pisaèeun oepami babad anoe parantos kapendak, dipedar dina P.S. koemaha toetoeranana moemoetkeun panaloengtikna [ 84 ]boedjangga anoe ngagelarkeun tjarita.

Dina boekoe-boekoe koena nja aja tjarita-tjarita babad anoe koe oerang beunang dipoeloengan, sapertos dina boekoe Badingh Indisch Arcshief djilid ka II (Tijdschrift De Indien, uitgegeven door Dr. S.A. Buddingh, ditjitakna dina taoen 1850) aja katrangan karadjaan Padjajaran, kieu ringkesna.

Saparantos Lemboe Ami Loehoer radja Djanggala (Kediri) poepoes, noe djenenganana kawentar Pandji Ino Kerta Pati. Sasoeredna Pandji Ino Kerta Pati; anoe ngasta karadjaan nja èta poetoe Lemboe Ami Loehoer, djenenganana Koeda Lalèan.

Koe margi Koeda Lalèan boerej kènèh nja ngaheujeuk nagara mah diwakilan koe anoe djadi mangkoe boemina, djenenganana Baka. Tapi Baka ngidjing sila bèngkok sembah, henteu lempeng ka Koeda Lalèan, boga niat nandasa ngareboet kakawasaan mèlaan sadèrèk Koeda Lalèan. Kawasna pang djadi petjoh kitoe teh lantaran poetra Pandji Karta Pati henteu djadi radja, kaselang tèa koe Koeda Lalèan. Baka hasil maksoedna, ger di Djanggala aja karaman anoe maksoedna noendoeng ratoe, Koeda Lalèan diloengsoer tina kaloenggoehan, ngadeg radja anjar.

Tjeuk sakaol Koeda Lalèan rada lami ngastana karadjaan, da dina taoen A.J. 1084 atawa taoen A.D. 1173, koengsi nekanan pamindang sarajana loeloerah para boepati nempoeh karaman bangsa Tjina, sarta oenggoel perangna, nja ti harita oerang Tjina patamboearna ka sakoeliah tanah Djawa. Tapi ieu mah katrangan teh rèa soelajana sareng tjarita-tjarita Djawa anoe lian.

Ari dina tjarita Djawa mah leres saoengel anoe ti pajoen, jèn Koeda Lalèan tèh dilindih koe sadèrèk lantaran kadjoeligan tarèkah Baka tèa.

Koeda Lalèan lolos ti nagara ngantoen kamoekten, kadengkian Baka sareng sadèrèkna teu diladènan, andjeunna mah ngèlèhan andjeun baè.

Dina sadjero keur petjoh kitoe, beledoeg goenoeng Keloet bitoe, lahar ngaroeksak sakoeliah karadjaan, mèh tjarem kakelem koe pamoekna goenoeng Keloet.

Oerang Djanggala maboer patawoeran, malah sadèrèk Koeda Lalèan, anoe djenenganana Tjitra Aroeng Baja, sareng Tjamara Gading mah sapangiringna kalaboer ka Selebes. Di ditoena ngadegkeun karadjaan, katelah Sawira Gading nja èta radja Boegis anoe mimiti.

Ari Koeda Lalèan koengsi memeres deui Djanggala, sarta kapi rama andjeunna anoe djenengan Bradja Nata, didjenengkeun radja di Djanggala. Ari andjeunna sareng iboena katoet pangiring-pangiringna angkat ka tebèh koelon nja ngadegkeun karadjaan Mendang Kamoelan anoe ajeunana djadi dajeuh Blora. Tapi Koeda Lalèan kapaksa kedah djengkar deui ti dinja, lantaran karaman tilas mangkoeboemina anoe djenengan Baka tèa, ngahihileudean baè, toengtoengna Mendang Kamoelan dikepoeng koe Baka, sarta Koeda Lalèan kadèsèh ladjeng boedal ti nagara, mindang saraja ka Radja Praoe Tjatoer di Gilingwesi, nja èta di Pasoendan.

Baka diroeroeg deui dihoeroep nepi ka èlèhna.

Koeda Lalèan teu kersa moelih ka Djanggala, nja ladjeng ngababakan di tanah Soenda tempatna di Tjidamar bawahan Tjiandjoer, nja di dinja tempatna Gilingwesi tèh.

Saparantos Koeda Lalèan aja di Pasoendan, andjeunna mendak hidji patempatan anoe narik kana galih, soeroep djeung noe lemboet, tempat hègar didjadjaran tangkal pakoe, nja ladjeng didamel babakan anoe nelah tepi ka ajeuna diseboet: „Pakoean Padjajaran”.

Babakan anjar katjida matak pikabetaheunana, moengpoeng anoe ngadon matoeh, boeboeara soeka betah, ti noe djaoeh miloe aoeb, ti noe anggang dararatang, lila-lila njda ngadeg nagara, ngawengkoe karadjaan Bodjong Galoeh. Noemoetkeun katrangan babad, karadjaan Bodjong Galoeh tèh kira-kira taoen A.J. 1084 geus ngadeg.

Anoe ngagentos Koeda Lalèan, poetrana anoe djenenganana Bandjaran Sari.

Sanggeus Bandjaran Sari poepoes, karadjaan Bodjong Galoeh robah wanda ganti roepa, nja èta harita ngadeg Paoemboe- [ 85 ]lan (Republiek), nja ieu Republiek anoe pangmimitina pisan di tanah Djawa (di Pasoendan). Djadi Bodjong Galoeh tèh harita henteu diradjaan deui, tapi digeugeuh koe kapala anoe diangkat sarta beunang milih sarèrèa, demi kabèhna aja sawelas djelema anoe beunang meting, anoe pikeun ngapalaan djeung marentah maranèhanana noe koedoe ngatoer ngaheujeuk nagara tèh. Ari eta kapala anoe sawelas beunang milih tèh paloenggoehanana (diseboetna) Oemboel.

Tapi èta atoeran kapaksa dirombak deui, lantaran poetra Bandjaran Sari anoe djenengan Praboe Moending Sekar kersa ngagentos paloenggoehan ramana ngadeg Radja deui. Praboe Moending Sekar digentos ke Praboe Moending Wangi, ari Moending Wangi digentos ke Praboe Moegi Wati.

Noemoetkeun katrangan babas, Padjajaran harita teh taoen A.J. 1112, atawa taoen A.D. 1200.

Demi Koeda Lalèan saparantos ngadeg radja di Padjajaran, djoedjoeloekna Praboe Brawidjaja Maèsa Tandraman. Demi eta Praboe Brawidjaja Maèsa Tandraman katjèloek ratoe linoehoeng, sabar adil palamarta, towèksa ka noe leutik, roemawat ka para wilajat, ngadjeujeuhkeun kana makaja ngagarap tanah. Nja andjeunna noe ngawitan njandak Maèsa anoe soendana moending, ti Djawa Wetan ka Pasoendan geusan magawe ngagarap tanah.

Dina dongèng ogè kaoengel jèn nadjan moending djarah, oepami ditjepeng koe Koeda Lalèan toeloej dadak sakala djadi lindeuk. (Paingan tepi ka ajeuna, basa moending mah, komo dina ngawoeloekoe, tetep basa Djawa baè, saperti: deroem, kia, oewis, loepoet, arang, manahareng asalna ti Djawa tjandak Koeda Lalèan S.d.R.).

Radja Padjadjaran kagoengan poetra pameget doea, anoe tjikal ngaraos keungkang teu hararetah sakoemboeh sareng sepoeh, nja lolos ti nagara; ari anoe djadi radja ngagentos ramana, rai anoe lolos tèa, djenenganana Praboe Moending Sari.

Doepi èta poetra radja anoe tjikal tèh ngalalanana kaloenta-loenta nja soemping ka Mekah, gentos agama lebet Islam. Nja andjeunna oerang Soenda noe pang mimitina pisan moenggah hadji, djenenganana katelah Hadji Poerwa.

Toedjoeh taoen lamina Hadji Poerwa ngantoen lemah tjai bali geusan ngadjadina Soempingna deui ka Padjadjaran njandak rentjang oerang Arab djenenganana Krai Amantang atawa Ansantang (Dina babad Tjirebon mah, tingali P.S. No.4, rèntjangna tèh doeaan, ari djenengan anoe makè Santang nja iboe S.G. Djati, roepina Kiai Asantang di dieu ogè, Kèan Santang tèa, djadi sanes rentjangna tapi sadèrèkna anoe istri. S.d.R.).

Hadji Poerwa djeung rèntjangna tèa hajang ngasoepkeun èlmoena ka oerang Padjadjaran, tapi teu laksana lantaran oerang Padjadjaran kandel kènèh imanna kana agemanana noe asal.

Koe tarèkahna djeung djoedjoerna lakoe Hadji Poerwa, nadjan radja Padjadjaran teu bisa kabandang ogè, tapi ari ngaroesoehkeun mah koengsi, andjeunna tèga ngaraman ngaroentagkeun Padjadjaran asal, nepi ka Radja kapaksa ngalih ka babakan dadakan di deukeut toetoegan goenoeng Salak djeung G. Gedè beulah kalèr, antara Tjiliwoeng djeung Tjisadanè, nja nelahna mah Padjadjaran kènèh, tempatna di dajeuh Bogor ajeuna.

KATRANGAN TI REDAKSI

Ieu anoe ditjarioskeun di loehoer, pamendak toean Buddingh dina taoen 1850, babakoena njandakna poko tina babad tina dongèng-dongèng, sanès tina boekti-boekti seratan atanapi patilasan. Ka-bèh-dieu-nakeun seuer boejangga anoe ngotèktak kaajaan djaman koena njoektjroek tina boekti-boekti. Djadi karangan babad djeung sadjarah mah, tetela, beuki deui, beuki tambah beunang dipertjaja, rèa anoe ninggang enja.

Dina ieu karangan salsilahna Ratoe Galoeh sareng Padjadjaran, komo ari taoen-taoenna mah seueur pisan soelajana. Nanging, nja èta sakoemaha anoe kaoengel dina boeboekana, ieu mah soepaja djadi timbangan ka anoe maraos. Sadjarah Padjadjaran anoe sanes, engkè baris dilebetkeun deui. [ 86 ]

Kagegelan ti M. Ardiwinata
Mantri Goeroe sakola
klas II Madjalaja.

ASMARANDANA.

1. Kagegelan oerang sisi; manawa djadi mangpaät, beunang poengpoeloeng-péngpéléng, kagaliban oerang Soenda, noe ajeuna geus langka, tali paranti ka poengkoer, noe matak jeu didadar.
2. Teu pisan-pisan meredih, mambrih sangkan dipilampah, dipalar woeroekna baé, malak mandar djadi sarat, saliring kahadeän, awéwé Jalaki kaedoe, nja milampah ka bageuran.
3. Biasa di anoe kawin, atawa anoe soenatan, noe tjoekoep sok maké njawér, sabada iring-iringan, didjieun karasménan, tapi éstoena woewoeroek, papagah kaoetamaan.
4. Sarat njawér anoe galib, bokor dieusian béas, tékték sakoerén djeung konéng anoe geus beunang njiksikan, diteundeun kana béas, ditambah doeit sabaroe, nja kieu pokpokanana.

NJAWER

Kinanti pangradjah

1. Poen sapoen ka Sang Roemoehoen, ka Batara ka Batari, ka Batara Maha Déwa, noe ngantjik di boemi soetji, loeménggang di alam padang, noe nitih di galih Goesti
2. Néda agoeng nja paraloen, néda agéng pangaksami, agoeng ka para djoeragan, djémbar kadang koelawargi, moega hènteu redjag manah, rèh toeang kaselang dangding
3. Djisim koering amit kaoel, nekanan nétépan djangdji, doeméhna awaling adjam, loemantoeng tjiptaning ati, oepami paréng laksana, pinanggih baring soepagi.
4. Dikadarkeun pandjang oemoer, toerkaboel panèdja ati, njalametkeun bararoedak, noe awèwè noe lalaki, dèk njawèr koe bèas bodas, sarta bari ngaharing
5. Hariring kawih pangroengroem, ngaroengroem noe karék soemping, soenggingan éremas wajang, ngaleut ngeungkeuj anoe ngaping, kadang warga mararidang., garandang sarta garinding.
6. Noe tjoendoek moelih ngalajoeng, ngalajoeng mangan-mangéning, hénang-héning manah sénang, diroengroem kawih pangriring, rarapén anoe maridang, kawangwang woeroek hariring.
7. Doeh anak toetoemboe oemoer, tandingan hoeriping diri, timbangan soekma laksana, ngan woengkoel Oedjang djeung Njai, kembang sotja boeah manah, ditanggeuj di poesti-poesti.
8. Noe goemantoeng siäng daloe, majèng manteng henteu lali, moegia Allah taäla, maparin ka Oedjang Njai, salamet djeung pandjang joeswa, loeloes bangloes lahir batin.
9. Linoengsoer élmoe noe Ioeloes, noe mangpaät kana diri, ti doenja rawoeh ahérat sarta moega-moega teuing, anak hoerip kadar moelja, pinanggih kamoektén diri.

........................................

NJAWER.

1. Baeu banget noe saranten,
noe mahal ti batan inten,
darangoekeun koe maranten,
aja pitoetoer sakintan.

2. Dina kitab geus kaserat,
djaga di alam ahérat,
Joba anoe geulis merat,
tjahajana ge’soemirat.

[ 87 ]

3.	Roepana nja widadari,
	di sawarga balawiri,
	panganggo intèn bidoeri,
	ngentjlong batan katoembiri.
4.	Geulis lenggik moelja kaja,
	tjaktjak moen gélar ka doenja,
	tangtoe sèrah ka sadaja,
	kahibaran koe tjahaja.
5.	Tapi aja deui djaga,
	noe geulis henteu pèrjoga,
	ajana di sawarèga,
	widadari henteu njangga.
6.	Eta istri bangsa oemat,
	awèwè noe meunang rahmat,
	geulis sinarna soemirat,
	tambah di sawarga nimat.
7.	Awèwè noe ditarima,
	ngabaktina koe Jang Soekma,
	noe hèman ka iboe rama,
	hadè tindak ka sasama.
8.	Anoe ngèsto ka salaki,
	ngabaktina taki-taki,
	gemi apik koe redjeki,
	djaoeh tina hiri dengki.
9.	Mana istri sing rantjagè,
	nja hoemadep ka tjarogè,
	dipiwarang agè-agè,
	toenda keur digawè ogè.
10.	Masing bisa titip diri,
	ambèh sepoeh soeka seuri,
	lampah oelah nganjenjeri,
	tjarogè miloe teu ari.
11.	Djeung tjarogè sing saati,
	manahna koedoe kasoerti,
	koemaha tali paranti,
	anoe kaseboet goemati.
12.	Soemawon aja tatamoe,
	sing singer hadè nja semoe,
	noelak lingsèm sing katimoe,
	koe èlmoe dèning-panemoe,
13.	Oelah pisan pantjabagah,
	kagoengan roemaos gagah,

	tangtoe tjoroge tèh seunggah,
	kawelasna moal tambah.
14.	Lamoen aja noe dipandang,
	sanadjan roepa salindang,
	oelah mawa manah bedang,
	koe èlmoe dèning-panemoe.
15.	Sing sabar dikakoerangan,
	roepa sandang roepa pangan,
	èlingkeun takdir sorangan,
	oelah njereng barangsangan.
16.	Anoe sabar èta pasti,
	dipikawèlas koe Goesti,
	Anoe disedja koe ati,
	soegan laoen-laoen boekti.
17.	Ka tjarogè masing koekoeh,
	tèkad ati masing pengkoeh,
	ka wargi oelah rèk angkoeh,
	djeung deui oelah salingkoeh.
18.	Sakitoe keur baris istri,
	koedoe toengkoes ati-ati,
	simpen dina djero ati,
	moegi baè masing boekti.
19.	Ajeuna noe dipiwedjang,
	ka pameger anoe boedjang,
	masing èling sapapandjang,
	oelah arèk kataradjang.
20.	Elingkeun piwoeroek rama,
	pangdeudeul panoelak hama,
	sing èling salama-lama,
	oelah dèk salah tarima.
21.	Ka bodjo sing lèah manah,
	sakadar noe matak genah,
	oelah noe matak toegenah,
	koe hoekoem moäl kamanah.
22.	Pameget sing harti naker,
	istri tèh koedoe dikeker,
	tapi oerang koedoe tjangker,
	sarta oelah matak soeker.
23.	Ka bodjo nja moelasara,
	oelah arèk lalawora,
	koemaha atoeran sara,
	ambrih loeloes nja salira.

87 [ 88 ]

24.	Ka bodjo oelah rèk njogok,
	barangasan hoeak-haok,
	mindèng matak djadi kagok,
	bodjo sing serewa mogok.
25.	Oelah rèk soelit bendoean,
	tiktikan djeung timboeroean,
	bisi poegag kalakoean,
	tjatjad koe noe saboeroean.
26.	Soemawon hampang panangan,
	teungteunggeul djeung nanggèlongan,
	bahjana mah ka sorangan,
	wirang tambah kabingoengan.
27.	Moen bodjo kaloeloepatan,
	woeroekan bèrè ingetan,
	soepaja kasalametan,
	oelah mawa napsoe sètan.
28.	Koe noe koerenan èlingkeun,
	sepoeh mah ngan ngadoengakeun,
	moega dilambat-lamboetkeun,
	roentoet raoet boga pakeun.
29.	Pasemoe masingna sarèh,
	gerah somèah darèhdèh,
	soegih moekti masin tèrèh,
	ngarèndèkèh batan sèrèh.
30.	Senang ati boga milik,
	bisa njoegoeh anoe tjalik,
	bisa mahanan noe balik,
	noe miskin koedoe katelik.
31.	Teroes tèh koe parahoeloe,
	ditambahan koe hanggasa,
	anoe hiroep tèh pereloe,
	nja nèangan pèngabisa.
32.	Mawa peti dina soendoeng,
	ditoempangan koe karindjang,
	pangarti teu beurat ngandoeng,
	tapi mangpaatna pandjang.
33.	Gagala pinoeh satjoët,
	ditapi rekah sanjiore,
	sagala bangsa noe awèt,
	teu nepi ka berkah goeroe.
34.	Kembang beukah dina njiore,
	baroejeng koe baranggasoe,

	mangpaatna berkah goeroe,
	majèng oepami tjinjoesoe.
35.	Ja Allah anoe kawasa,
	noe maparin nimat rasa,
	noe wenang ngagandjar njiksa,
	ngadjoedjoerkeun ka manoesa.
36.	Jisim koering téh njanggakeun,
	ieu noe dikariakeun,
	moegi-moegi dilojogkeun,
	kana iman amalkeuneun.
37.	Teu ngaborongkeun Pangéran,
	naon baé pangatoeran,
	da aja marga lantaran,
	noematak djembar dadaran.
38.	Boh tani boh djoeal meuli,
	boh pangkat milampah koeli,
	boh njantri ngawoeroek ahli,
	ngebatkeun tali paranti.
39.	Moen lojog kana hal tani,
	masing wekel sing pereni,
	sing boekti datangka oeni,
	njoekoep indoeng bapa nini.
40.	Sing djadi nja pepelakan,
	tjoekoep maké tjoekoep ngakan,
	sing aja nja kaoendakan,
	masing boga toetoempakan.
41.	Neundeun doeit neundeun paré,
	seueur ketan emas oeré,
	ka baraja koeat méré,
	di doenja tiis nja saré.
42.	Lamoen lojog kana dagang,
	koeat mais koeat manggang,
	angkat senang ngagandeuang,
	moegi dipaparin padang.
43.	Masing bisa bibirintik,
	tina djalanan balantik,
	mangpaat koe modal leutik,
	boga soang boga itik.
44.	Henteu pandjang nja miwoelang,
	noe njawér keseleun toelang,
	geus palajeun eusi doelang,
	geus lami hajangeun moelang.

88

[ 89 ]

Paririmbon.

Poesaka Soenda badè dieujeub-eujeub koe roepi-roepi peperenian, loemajan keur tawis sotja, sareng malak mandar kenging dianggo panaratas djalan ngoelik basa.

Ieu ngawitan tina roepi-roepi sahadat, asihan, parantjah, singlar dj.s.t. anoe ilahar kènèh djadi ageman di padoekoehan, tambihaneun dangdosaneun.

SAHADAT.

1. Sahadat Soenda.

Ashadoe Sahadat Soenda, sapapada djeung pandita, nèang indoeng noe kabdoehoe, nèang bapa Hidajattoelah, noe majoengan sadjagat, noe dipajoengan sadjagat, nèangan Pangèran koedratoellah, lailah haileloh Moehammad Rasoeloellah.

2. Sahadat Djawa.

Apa pengot soerat Radèn Angga Keling pangèran Anggawaroeling, ratoe soeloek adjiloelah pangèran sanoesa Djawa, poe-poetranè oelis akin kadjajak ngaroeroeg ka Padjadjaran, tanggal ping opat welas, noekila di kalimati sahadati, isoen weroeh oemat Allah dikang Selam.

3. Sahadat Bawa.

Ashadoe Sahadat Bawa, iman djati loeloengoehan poelo njawa, roh njawa intening hoerip, hoerip teu keuna koe gingsir, langgeng teu keuna koe owah, lailah haileloh Moehammad Rasoeloellah.

4. Sahadat Taradjoe.

Ashadoe sahadat taradjoe, idin imatan warohmatan, walidatan, wasiratan, titikaptan minha ja hoe, ja Allah ja Rasoeloellah.

5. Sahadat Sajang.

Ashadoe sahadat sajang, koerilling ka boemi soetji tjat mantjat ka djaget moelja, tètèsan ditètès koe Allah, ja hoe ja Allah ja Rasoeloellah.

6. Sahadat Sari.

Ashadoe sahadat sari, gegedah wadah loemenggang, ngeboer-ngeboer lain ratoe, ngebjar-ngebjar tjahja ning Pangèran, pajoeng tiloe noengkoe-noengkoe, pajoeng emas jingga pati, kakajon sabar darana, teteras sekar tjandana.

7. Sahadat Adam.

Ashadoe Sahadat Adam, sah Adam. Ashadoe Noer Poetih alip toenggal, Moehammad tanggal, iman èling dat moelja kang kadim. Lailah haileloh Moehammad Rasoeloellah.

8. Sahadat Bardjah.

Ashadoe Sahadat Bardjah, enggon Allah sapatemon, Sang Moetiara poetih tjalik di iman, patala ratoe miski adja ningratoellah, titipan gedong kantjana, nama Allah Rasoeloellah lailah hailleloh.

9. Sahadat Hajoen.

Ashadoe Sahadat hajoen, hajoen-hajoen hoerip kang hoerip, tjitjipta Goesti kang waras, tjitjipta Allah tjipta rasa kang kawasa, tjeg badan woedjoeding Allah Rasoellah, nanja badan, tjeg badan woedjoeding manoesa.

10. Sahadat Siloeman.

Heuah baloeng nangtoeng toelang, toelang moentang, tjolok rasa koe boeana, deg haneng koemili rasa, aing njaho ratoe sia, anak sia Ratoe Siti, amboe sia ratoe neloeh ti Galoengoeng, bapa sia pangoeloe Djin.

89

 

[ 90 ]

11. Sahadat Moestakarajoeman.

Ashadoe moestakarajoeman, sahadat permana toenggal, selam lahir selam batin, selam pinarenging kersa, sing waspada ka noe ngajoega boemi alam, aja noe saoerang aja noe sorangan, sing waspada kapada Allah, Allah waspada ka kaoela, tenger gemereng-ereng, raraga gemet roehiat, teroes ning Alllah teroes ning rasa, pani-pani langgeng tetep, langgeng agama Islam

12. Sahadat ganda.

Ashadoe ganda ningsoen toeroen saking sawerega, ningal ganda ningsoen sampoerna, ganda ningsoen an handri kamar langit karaton.

ASIHAN.

1. Asihan si Toendjoek tjoeroek.

Asihan aing si Toendjoek tjoeroek, toendjoek tjoeroek todjo rasa, berendjing koe tata tanding, koelanjtieur balik deui, nèang akma sia katinggaleun, geus katoengkoes geus kakandoeng koe awaking, malik welas asik ka awaking.

2. Asihan si Boeroeng poendoeng.

Asihan aing si Boeroeng poendoeng, maoeng poendoeng datang oemoem, badak galak datang depa, oraj laki datang noempi, boeroeng poendoeng boeroeng tjidra koe karoenja, malik welas malik asih ka awaking.

3. Asihan pangantèn.

Kirik-kirik andjing leutik, entjak-entjak andjing batara, sia andjing aing tai, eur panganteur pangantèn anjar.

4. Asihan si Taroek gadoeng.

Asihan aing si Taroek gadoeng, sataroek matak lalandjoeng sataoen, salambar matak kelar saboelan, sasoèk matak lèwèh sapoè, kèdjo asa tjatang bobo, tiis batan birit leuwi, deuk indit ngarampa birit, deuk leumpang ngarampa djoengdjang, diloeabkeun koeda kantjana, reup angkeub djleg sorangan.

5. Asihan paranti ka mènak.

Asih aing asih ratoe, asih aing asih mènak, asih nini asih aki, asih indoeng asih bapa, patepoeng imoet papanggih seuri, Atma sapinggan teu leumpang, satjoepoe teu miloe, gedag majang di boeroean, toetoek le

6. Asihan paranti ka awèwè.

Ong manon sakawaaton, inoera poetih anem djati tangkal soeka, sih asih ka awaking.

7. Asihan paranti ka awèwè kènèh.

Sri asih moenggoeh di halis, Sri hèrang moenggoeh di tarang, Sri meument moenggoeh di beungeut, Sri tjinta moenggoeh di mata, sira welas sira asih ka awaking.

8. Asihan si Majang ara.

Asihan aing si Majang ara, majang ara majang asih, panoetan majang asihan, loeloehoer panemoe nira, ja isoen anak sira, handap panemoe sira, sira oelah giroek ka aing, aing njaho di ngaran sira, sira si noehoe si nèhè, sih asih ka awaking.

9. Asihan si Tjangkoerileung.

Tjangkoerileung beureum beuheung, anteurkeun kabogoh aing ka djalan, los ka djalan asa sasar, boeroean asa lajoean, balè gedè asa rèhè, kèdjo asa tjatang bobo, tjai asa toeak bari, teka lengleng, teka oeleng, oeleng meleng ka awaking, sih asih Nji . . . . ka aing.

9. Asihan Sang Koeriang.

Kitjeup tjidet laja tineung, asihan panodjo angin, lèrèt larang Sang Koeriang, asihan sang koelipet mata, sia kèdjo aing laoek, sia kirik aing tai moen tineung hiap toetoerkeun.

Aja samboenganana.

SOERJA DI RADJA.

90

 

[ 91 ]

Sair Soeunda Beunang
ngoempoelkeun
R.H.S.d.P.

21.	Ka anak ngeunah tingali,
	lamoen anak mindêng lali,
	nja tonggoj kaloeli-loeli,
	teu boga barang beuli.
22.	Ka kolot nja lalampahan,
	nja ngilangkeun kasoesahan,
	tiron anak pasirihan,
	rempoeg taja noe bantahan.
23.	Oerang noe hiroep di doenja,
	koedoe baè oerang aja,
	kahadèan ka baraja,
	sanadjan oerang tèh kaja.
24.	Henteu soewoeng pangaboetoeh,
	kagenahan tara matoeh,
	sok hajang ditoeloeng boetoeh,
	manggih karêrêpêt moetoeh.
25.	Mana koedoe daèk tjèrèk,
	mamalana anoe korèt,
	ana koe bahla kapèlèt,
	wargi ge êmboeng ngareret.
26.	Nya banda tatalang raga,
	mangpaät ajeuna djaga
	di doenja matak sajaga,
	batin keur meuli sawarga.
27.	Arta di soenja sok njiksa,
	sapêrti noe boga rosa,
	dek make njaäh karasa,
	ngan resep hajang ngaraksa.
28.	Poegoeh ka batoer satêngah,
	dipake maneh gè njaäh,
	eta arta njègag ngangah,
	di doenja teu matak boengah.
29.	Lamoen rahajat pihatoer,
	anoe ngagorèngkeun batoer,
	oelah dek ngagoegoe tjatoer,
	moen keukeuh salahna atoer.

30.	Moen goegoean kana lètah,
	babari bêndoean bantah,
	tantoe batoer moal bêtah,
	katangting hese dek nitah.
31.	Pamêgêt istri noe soegih,
	moen taja noe ngoeroes gigih,
	moal toeloej sirna linggih,
	tangtoe ripoeh dioek pigih.
32.	Oerang noe matak kalangsoe,
	nja-eta dieusi napsoe,
	napsoe teh sok goeroeng goesoe,
	alah batan adat asoe.
33.	Moen make hajang sajaga,
	hajang anoe oenggoek harga,
	kadjeun teuing henteu boga,
	da hajang ngaroeksak raga.
34.	Sakahojong koedoe roepa,
	nadjan raga leutik rampa,
	soepaja raga asepa,
	amrih di achirna papa.
35.	Mana moenggoeh anoe sabar,
	ari hajangna mah lêbar,
	ngan napsoena teu dioembar,
	sieuneun ragana lêbar.
36.	Ngamoek ogè tjara matjan,
	napsoe ngadjak makè loktjan,
	noe samar pagon da tatjan,
	pinêpieun kana loktjan.
37.	Ana dianteur binasa,
	teu koeat gè maksa-maksa,
	sok ngandjoek gasab ngawasa,
	amrih raga sênang siksa.
38.	Moen nganteur pikahajangeun,
	nanding heula rawoe leungeun,
	lamoen rawoe ngan setèngeun,
	oelah njokot saoewangeun.
39.	Moen panger sakitoe èta,
	diri tangtoe moeloes lita,
	moal soesah koe di sita,
	disita ge kasakoeta.

91

 

[ 92 ]

40.	Moen hênteu dibanding-banding,
	tjara keujeup hajang ginding,
	wani-wani noengtoen moending,
	kadjedjek henteu kahiding.
41.	Da ka poetra hajang doemoek ,
	toeloej napsoe oemak-amoek,
	no leutik noengtoen noe gemoek,
	ana kadjedjêk teh rêmoek.
42.	Noe kitoe teh napsoe keneh,
	tad mah karasa aneh,
	koe poetri hajang disaneh,
	achirna ngaroeksak maneh. (Baris disamboeng). Goegoeritan Tjitamlang Soemedang Sinom ngamalkeun pantjoeran, ka sadaja kantja wargi, ka noe sami kersa siram, ka pameget saring istri, sareng moegi ka Jang Widi, soetji wening kalboe, noe siram moegi daramang, saè manah boedi manis, tingkah polah nganggo adat noe sampoerna. Tjitamiang banjoe hèrang, malah mandar matak wening, wening langgeng manah senang, senang seneng manah èling, èling oelah hojong maling, maling tèh asalna moelang, orakana sok kapalang, salirana sok tigoeling, tigoelingna naraka tangtos kasorang. Kasmaran moegi pepeling, ka poetra anoe kapalang, oelah pisan kenging melèng, ramana kedah miwoelang,

soepaja oerang teu melang,
kedah larang maling moeloeng,
soepaja sadaja senangg.
Senang ningal moerangkalih,
lamoen lampahna teu salah,
moegi-moegi oelah welèh,
welèhan njarèk noe salah,
bilih oerang djadi soesah,
paneda moegi sing moeloes,
moeloes manah amal loeas.

---

Wawatjan Siliwangi

(Samboengan Poesaka Soenda No.3)

SINOM.

143.	Sanggeus Radèn dihideungan,
	kawas loetoeng baè badis,
	pinggel kanglakoeng sadaja,
	ganti roepa djadi beusi,
	Asmoenalarang bengis,
	Kai Tandesan dioetoes,
	sia ajeuna leumpang,
	djalan leuweung ka basisir,
	Manarasa djoel sapajoe-pajoena.
144.	Soekoer moen pareng kapapag,
	jeung nangkoda oerang Kaling,
	anoe lajar dina kapal,
	atawana Djenggi Habsi,
	anoe kira daèk meuli,
	sok moen ka toekang parahoe,
	Tandesan amit njembah,
	Pamoenahrasa diiring,
	njorang leuweung boeboelak bantèng djeung badak.
145.	Patih djeung Asmoenalarang,
	geus boedal pada maroelih,
	tatapi manah salempang,
	rèmpan rada araringgis,
	noe mawi miwarang indit,
	Papagratang koedoe njosoel,
	sok dibahanan soengkelang,
	geusan nigas ngarah pati,
	oelah taha soepaja henteu katara.

92

 

[ 93 ]

146.	Papagratang nampi pedang,
	ngemban timbalan djoeng indit,
	goera-giroe leumpang gantjang,
	wantoe njoesoel noe geus tebih,
	Kotjap Tandesan deui,
	ngoentit-ngoentit Radja Soenoe,
	noe angkat kalémpohan,
	nalangsa djeung gerik galih,
	tina nahnaj ngangres bidjil tjisotjana. MIDJIL.
147.	Ki Tandesan hatoer melas-melis,
	mangga oerang ngaso,
	abdi ogé sakalangkoeng tjapé,
	sareng ajeuna parantos boerit,
	ngilari keur meuting,
	kiara noe loehoer.
148.	Radén lirén sahandapeun kai,
	ladjeng baé ébog,
	kana tjanir kai ngagéléhé,
	koelem tibra lila henteu tanghi,
	kotjap noe pandeuri,
	Papagratang njoesoel.
149.	Datang njampak keur koelem Sang Adji,
	oetoesan aléwoh,
	dawoeh Goesti Radén toegel baé,
	ieu pedang pikeun oerang meuntjit,
	saenggeus badami,
	ragem rék ngahoerep.
150.	Mesat pedang diloegas rék meuntjit,
	noe koelem dirongkong,
	doemadakan leungeunna méréngkél,
	banget panas karasana njeri,
	oetoesan djoemerit,
	adoeh bioeng toeloeng.
151.	Radja Soenoe ngorédjat hég tanghi,
	kagét pok marios,
	Papagratang na koe naon manéh,
	karék témbong tjeurik ting djarerit?
	Oetoesan loemengis,
	adoeh Goesti ampoen.
152.	Leungeun abdi Agan langkoeng njeri,
	ting péréngkél ramo,
	raos panas lir koe seuneu baé,
	moegi aja sih hapoenten Goesti,

	réhing abdi tadi,
	kana peunteu madoek.
153.	Radén njaoer bari imoet leutik,
	lahirna geura los,
	ngala daoen sandilata baé,
	anoe ngora bodas toer beresih,
	bawa mangka gasik,
	koe oeing disemboer.
154.	Papagratang Tandesan arindit,
	soempoejang sampojong,
	sandilata manggih noe haradé,
	arék ngala henteu bisa metik,
	ramona tjarentik,
	dipahpral koe soengoet.
155.	Pandakawan doeaan moeringis,
	ka Rahadén tjaos,
	sandilata diasta koe Radén,
	ladjeng anoe ngorana dipilih,
	dikoembah beresih,
	dianggo keur njemboer.
156.	Saharita leungeun hadé deui,
	tjageur teu morongkol,
	dadak sakala matihna djampé,
	poelih tjara baheula bihari,
	Dén Anom ngalahir,
	manis bari imoet.
157.	Papagratang na njoesoel pandeuri,
	dipiwarang naon,
	tjing tjarita sawaktjana baé,
	naha mawa soengkelang raka Dji?
	Ki oetoesan seuri,
	noen Goesti soemoehoen.
158.	Djisim abdi ditimbalan ngiring,
	réh raka kawatos,
	wantoe angkat njorang leuweung gede,
	bilih di djalan aja balai,
	pedang keur ngabasmi,
	banténg badak maoeng.
159.	Radén Anom mésem pok ngalahir,
	soekoer geus kahartos,
	kahémanan raka langkoeng saé,
	moega aja walesing Déwa Di,
	atoeh oelah lami,
	hajoe oerang madjoe.

93

 

[ 94 ]

159.	Boedal kabeh engkat noe ngariring,
	geus djaoeh ngaraso;
	tengah poé Radén langkoeng tjapé,
	eureun ébog di handapaeun kai,
	lesoe liwat saking,
	reup koelem ngaringkoek.
160.	Koelem tibra teu oesik teu malik,
	Papagratang atoh;
	ngaharaweos ka batoerna noél,
	koema akal enggon ngarah pati,
	réhna Radén leuwih,
	pangawasa poendjoel.
161.	Pakarang mah oerang geus teu mahi,
	deukeut gé teu kaop,
	leungeun oerang sok pating péréngkél,
	ajeuna djadjal koe akal pelit,
	koe tambang dibeulit,
	tjolokkeun koe kajoe.

162.	Kana tenggek doea tiloe beulit,
	tambang sina njorok,
	oelah deukeut oerang anggang bae,
	toentoeng tambang tjangtjang kana kai,
	sabeulah ditarik,
	koe oerang sing djaoeh.
242.	Saenggeusna doeaan badami,
	tambang teh parantos,
	ditjorokkeun ka Radén noe saré;
	didjedjeuran si tambang koe kai,
	tenggek geus dibeulit,
	kari ngenjang woengkoel.
	(Aja samboenganana)

94

 

[ 95 ]

Artos Langganan P. S.

Doegi ka ping 7 December 1922, postwissel anoe parantos katampi ti Djoeragan-djoorgan:

No	106	Toean Directour N.S. Poorwakarta.
	265	K Wiriamihardja Bandoeng.
	169	E. Abdoelhamid Anjerlor.
	586	Djoer. Wirasasmita Bandoeng.
	587	M. Mangoonsoewargo Hoofd-Djaksa Pekalongan
	589	Volksiectenr Weltevreden.
	109	R. Mamoon G. Paseban.
	425	R. A. Hamami G. Pasehan.
	492	Djoor. Oeij Tjoen Lok Bogor.
	336	(?) Rd. Wiriaatmadja Tjibodas (?).
	-	Djoer. Maskar Bandoeng 19.23
	338	Djoer. Wiriaatmadja Bandoeng
	34	R. Prawirakoesoemah Tasik
	230	R. Martadibrata Tasik
	328	Nji R. Saidah Tjiandjoer
	345	Djoer. Basari Astanaanjar
	555	Rd. Rg. Sostadilaga Wadana
		rengas dengklok.
	10	Djoer. Winatapoora Bandjaran
	278	Djoer Soetawidjaja Tjiateul
	229	R. Padmakoesoemah Tasik.
	75	Djoer Mh. Joenoes Tasik
	462	M. Soekarta adbi Poera Sindang Laoet
	347	Kandjeng Dalem Pangsioen Poerwakarta
	332	Djoer. Oedjer Tjinanas
	70	R. Bratakoesoemah N.S. Garoet
	292	M. Kd. Mangoendimadjja Garoet
	60	Djoer. Soehandi Ganghoentoe
	600	Rd. Martasoedirja Mr. Cornelis
	50	M. Poeradiredja Salemba
	7	D. Soemodihardjo Rawabangke
	186	R.I Koesoemantri Nederland
	573	M. Wiradikarta Welt
	571	R. Wiriaatmadja Welt
	110	Djoer. Momod P.S.D
	185	E. Poeradiredja Kerklaan
	354	Djoer. Tanoewangsa Serang.
	592	R.E. Wiradimadja Lembang.
	598	Djoer. Partasoeandana Mr. Corn
	27	Rd. Sasmitapoera Soekaboemi
	160	M. Kartadimadja Soreang.

8	Rd. Mahmoed Boekitdoeri.
191	Djoer. Wangsanata Bloentas
112	Djoer. Partawidjaja Gangboentoe
584	Rd. Poeradiwidjaja Teloekbetoeng.
477	S. Soetadinata Tjitjendo
192	S. Sastradiwiria Petodjo
421	T. Bakri Rangkas
82	Djoer. Soeanie Rangkas
85	„ S. Ardiwiria Bandoeng
161	Rd. Wiratakoesoemah Welt
?	Rd. Koernawidjaja Gangboentoe.
181	Toean v. Noppon Garoet
402	R.Moh Amin Bogor
144	M.I. Padmawinata Rengasdengklok
289	A. Soeardi Indramajoe
603	Djoer. Darmasantana Indramajoe
604	" Djohari "
88	Rd. Bratadidjaja Poerwakarta
319	Kd. Z. Abidin Serang
331	Djoer. Mh. Kombali Tasik
327	" Pskih "
326	" Sirnasoebaja "
432	Kandjeng Dalem Tjiamis
433	Rd. Ad. Ar. Koesoemasoebrata
	Kandjeng Pangsioen Tjiamis (Artos)
	langganan taoen pajoen 1923-1924)
93	Djoer. Soeradireja Balaradja.
127	Rd. Gandawinata Soekaboemi.
609	Rd. Saleh Pasirhalang.
117	P. Sastraprawiro Tangerang.
9	T. Soemadikaria Tanah Abang.
607	Djoer. Soemarta Mandirantjan.
606	M. Hardjadinata Salawoe.
608	M. Soetisnadiredja Tjikarang.
605	Djoer. Partadiredja Soekahadjo.
300	M. Sastradipoera Tegallega.
588	M. Antadiredja Tjiandjoer.
240	I. Bratanagara Sawah Besar
279	M.H. Partadisastra Bandoeng.
72	G. Prawirawinata Benda.
405	R. Wirasapoetra Gangbaroe.
304	M. Wangsamihardja Bogor.
582	B. Soekrawinata Laaan Menu.
622	Djoer. Soemitra Mr. C
621	Rd. Djajasasmita Pasanggarahan.
80	A. Mangoendibrata Rangkasbitoeng.
323	R. Moechlis Bandoeng.
56	R. Soeriasapoetra Garoet.
576	O. Tedjaningsih Tegallega
157	R. Abdoellah Tasik
166	S. Soerawinata "
156	M. Soerawiangga "

[ 96 ]

158	R. Tanoewidjaja Tasik.	630	Rd.Wirapoetra Maleber.
212	Djoer Moechali ″	−	M. Wiradiredja ƒ1 Kallipoetjang.
211	M. Kadmawiredja ″	95	M. Wangsadiredja Laan Menu.
154	E. Djajapernata ″	602	Rd. Soedarma Bandoeng.
457	Rd. Tanoewidjaja Landraadsteeg	457	Djoer Adenar Bogor.
	Tasik.	243	R.A. Soerapradja Mr. C.
391	Djoer. Ardiwinata Madjalaja	131	Djoer S. Goenawan Tjipakoe
475	M. Wiradinara Bandoeng.	136	Djoer. Akis Tjimahi
394	M. Hidajat Tjisondari.	572	Djoer. Soekarnadipradja Welt.
620	M. Mangoenatmadja Karanganjar.	276	″ Parma Iskandar Bandoeng.
314	M.A. Gandasoemantri Soemedang.	435	″ Wiradimaja Menes
193	P. Prawiradinata Petojo.	62	″ A. Soeandanata Madjalengka
177	M.A. Kartadiredja Panarangan.	337	″ Enggoeng ƒ1,50 Bandoeng
273	R. Soekadiria Tjimahi.	-	″ Maskar Pietspark ƒ30. -
37	Rd. Tanoeamidjaja Pagaden.	-	Toeb Darmaatmadja Rangkasbi-
41	M. Soekatmadireja Liangdjoelang.		toeng.
76	M. Wignjaatmadja Krawang.	49	Rd. Sastrawidjaja Salemba.
565	Djoer. Nitiwardaja Lamepajoeng.	218	M. Tanoedimadja Sindangherang.
257	Rd. Sastranagara Bandoeng.	461	Rd. I. Adikoesoemah Soemedang.
. . .	Djoer. Kartiwa Soemantri Batavia.	577	Rd. Oesmansjah Djasinga.
295	Djoer. Prawirasoemantri Poerwa-	55	Rd. Tanoewidjaja Garoet.
	Karta.	638	Djoer. Natawidja Loeragoeng.
294	Djoer. Kartadjoemana Poerwakarta	40	Mas, Sanoesi Karawang.
581	" Sastadiwirija Tandjoeng Pan-	334	Mas Soeria Tegallega.
	dan.	635	M. Mintadisastra Soebang Tjirebon.
15	Djoer. Affandi H.I.S. Bogor.	636	Rd. Wiratmadja Tjiamis.
149	Th. K. Wesnachoerni Leuwiliang.	637	Rd. Ardisoma Wanajasa.
111	R. Prawirakoesoemah Rawabangke.	382	Mas Tjakrawardhana Serang.
309	Djoer. Mangoendikaria Serang.	409	M.E. Soediadinata Singaparna.
367	M. Satiadikaria Padarintjang.	165	Rd. Soeriadilaga Lewo.
83	R.E. Dirdjasasmita Tjipanas.	460	R.M.B. Soeradirana Welt.
305	R. Wiramantri Tjiamis.
619	R. Boesono Karang bidara Sema-		________
	rang		Seueur keneh Djoeragan-djoeragan anoe
66	R.E. Kartapradja Tjiamis		parantos ngintoenkeun postwissel namoeng
366	M. Astraatmadja Goenoeng Sari.		teu atjan kalebetkeun, baris dilebetkeun
119	Djoer. Prawiraatmadja Bodjongsa-		kana P.S. No. 7.
	lam.		Teu aja sanes, Redaksi oendjoen noe-
634	R. Enoes Garoet.		hoen kana pangdeudeul sadaja, margi oepa-
633	R. Md. Moestafa Tjibatoe.		mi tea dirodjong tangtoes eunjeuh.
632	M. Nitisasmita Ligoeng.
631	M. Hardjamadenda Cipaganti.		Redaktie P.S.

---

Kalawarta Poesaka Soenda

Taun ka-1	Taun ka-2	Taun ka-3	Taun ka-4	Taun ka-5	Taun ka-6
1922-07	1923-07	1924-07	1925-07
1922-08	1923-08	1924-08	1925-08
1922-09	1923-09	1924-09	1925-09
1922-10	1923-10	1924-(10-12)	1925-10
1922-11	1923-11	1925-01	1925-11
1922-12	1923-12	1925-02	1925-12
1923-01	1924-01	1925-03
1923-02	1924-02	1925-(04-05)
1923-03	1924-03	1925-06
1923-04	1924-(04-05)
1923-05	1924-06
1923-06